જ્યારે પેરન્ટ્સ જ પોતાનાં બે સંતાનો વચ્ચે ભેદ કરતા હોય ત્યારે શું કરવું?

હું ૧૮ વર્ષની છું. મારા ઘરમાં મને હંમેશાં ઇગ્નોર કરવામાં આવે છે. તું નાની છે, તને ન સમજાય.

depress


સેજલને સવાલ - સેજલ પટેલ

સવાલ : હું ૧૮ વર્ષની છું. મારા ઘરમાં મને હંમેશાં ઇગ્નોર કરવામાં આવે છે. તું નાની છે, તને ન સમજાય. મારી મોટી બહેન ભણવામાં અને દેખાવમાં બન્ને રીતે હોશિયાર છે. તેનાં લગ્ન માટે છોકરાઓ જોવાની તૈયારી ચાલી રહી છે. ઘરમાં બધાને દીદીની પડી છે, મારી કોઈને નહીં. મને ખબર છે કે હું તેના કરતાં ભણવામાં નબળી છું અને દેખાવમાં પણ ઓછી સ્માર્ટ છું. તેમણે કદી મને પ્રેમ કર્યો જ નથી. મેં હંમેશાં મોટી બહેનનાં ઊતરેલાં કપડાં જ પહેર્યાં છે. મને બહુ એવું લાગે છે કે મારા પેરન્ટ્સ મને ચાહતા નથી. તેમને બીજો દીકરો જોઈતો હતો અને હું આવી એટલે તેમને ગમ્યું નથી. નાની હતી ત્યારે આ બધું નહોતું સમજાતું, પણ હવે હું બધું સમજી શકું છું. જ્યારે પણ હું મમ્મીને ફરિયાદ કરું કે કેમ બહેન માટે બધું નવું આવે, મારા માટે કેમ નહીં? તો એ વખતે તેઓ મારા માટે એક ડ્રેસ લાવે. જાણે મારા પર મહેરબાની કરતાં હોય. મારે એવી મહેરબાની નથી જોઈતી. મારા પપ્પા મને કદી ભણવાનો ફોર્સ નથી કરતા. તારે જે કરવું હોય એ કર એમ કહીને છૂટી જાય છે. જ્યારે મારી મોટી બહેનને ડેન્ટિસ્ટ બનાવવા માટે તેમણે ખૂબ મહેનત કરી. હું પણ તેમની દીકરી છું, છતાં મારી સાથે આવો અન્યાય કેમ?

જવાબ : એક પંક્તિ છે - ‘કોઈનો પ્રેમ ક્યારેય ઓછો નથી હોતો, આપણી અપેક્ષા જ વધારે હોય છે.’ એમાંય જ્યારે જે અટેન્શન પોતાને મળે એવી ઇચ્છા હોય ત્યારે એ બીજાને મળે તો ખૂંચે પણ ખરું. તમે જે ઉંમરે છો ત્યાં આવી લાગણી થવી સ્વાભાવિક છે. આ સમયે ગમેએટલાં પ્રેમ, હૂંફ અને સહાનુભૂતિ મળે એ ઓછાં જ લાગતાં હોય છે.

એક વાત સમજવી જરૂરી છે કે જેમ આપણા પંજામાં પાંચેય આંગળીઓ સરખી નથી હોતી એમ એક પરિવારમાં ઊછરતાં બધાં જ સંતાનો સરખાં નથી હોતાં. એટલું જ નહીં, દરેક આંગળીનું આગવું મહત્વ હોય છે છતાં દરેક આંગળી પાસેથી એકસરખું કામ ન લઈ શકાય. દરેક પેરન્ટ્સનો તેમનાં સંતાનો સાથેનો સંબંધ પણ યુનિક હોય છે. પેરન્ટ્સ મોટા ભાગે દરેક સંતાનને તેમની જરૂરિયાત મુજબ ટ્રીટ કરતા હોય છે જેને તમે પક્ષપાતનું નામ આપી દીધું છે. હવે મોટી દીકરી પરણીને જતી રહેવાની છે ત્યારે તેના પર વધુ ધ્યાન અપાઈ જાય એ સ્વાભાવિક છે.

આપણે જ્યારે આપણા હાથમાંના લાડવાની સરખામણી બીજાના હાથમાં રહેલા લાડવા સાથે કરીએ છીએ ત્યારે મોટા ભાગે એમાં ભેદભાવ થયો છે એવું જ લાગે. એના કરતાં આપણા હાથમાં રહેલા લાડવાનો સ્વાદ માણવાનું કામ કરીએ તો મોંમાં મીઠાશ આવવાની જ. તમને એવું લાગે છે કે પેરન્ટ્સ તમને અન્યાય કરે છે એટલે કદાચ તમે તેમની સામે ફરિયાદ પણ કરતાં હશો. તેઓ તમને નથી સમજતાં એ માટે ગુસ્સો પણ કરતાં હશો.

એના કરતાં તમે એક પ્રયોગ કરો; તમારા પેરન્ટ્સ તમને પ્રેમ આપે એવી અપેક્ષાને બદલે તમે તેમની કાળજી રાખવાનું શરૂ કરી દો. ધારો કે તેઓ પક્ષપાત કરતાં હોય તો પણ એને નજરઅંદાજ કરો. ફરિયાદ કરવાથી તમને પ્રેમ નથી મળતો. માગીને કે લડીને પણ પ્રેમ નથી મળતો. પણ જો તમે તમારા પેરન્ટ્સને પ્રેમ અને કાળજી સામેથી આપશો તો બન્ને તમને રિટર્નમાં જરૂર મળશે.

Add comment


Security code
Refresh

Joomla SEF URLs by Artio