કથા-સપ્તાહ - યાત્રા (એક સફર - 5)

‘વી લ...વ યુ શાહબાઝ!’

 

 

અન્ય ભાગ વાંચો

1  |  3  |  4  |  5  |

 

ગગનભેદી નારાથી વડોદરા શહેરનું રેલવે-પ્લૅટફૉર્મ ગાજી ઊઠ્યું. પ્લેટર્ફોમની બેઉ બાજુ, પુલ પર કીડિયારાની જેમ લોકો પોતાના માનીતા સ્ટારની એક ઝલક જોવા ઊભા હતા.

- અને ખાન દ્વારે દેખાયો.

કંઈકેટલા કૅમેરાની ફ્લૅશ ઝબકી ઊઠી. શાહબાઝે ફ્લાઇંગ કિસ ફંગોળતાં ચિચિયારી પડી...

લોકોની ઘેલછા જોઈને કાતરિયે બેઠેલી તાનિયા સ્તબ્ધ બની. શાહબાઝે તેના ભ્ય્ સેક્શનને બરાબર કામે લગાડ્યું લાગે છે. હશે. એથી મારું મિશન નહીં ટળે. પર્સ ખોલીને તેણે ઈંંડું હાથમાં લીધું અને નિશાન તાક્યું...

... અરેન એ જ એરિયામાં ચકોર નજરે આંટાફેટા કરતો હતો.

અરેનની હાજરી ધનરાજને નર્વસ કરતી હતી. ખોટું કરવાનો ધ્રાસકો તો માણસને રહેતો જ હોય છે. એમાં પકડાઈ જવાની ભીતિએ ધનરાજની ધડકન તેજ થઈ. એમાં વળી આગલા ડબ્બા આગળ જામેલી ભીડ અહીં સુધી વિસ્તરી હતી અને એનોય હડસેલો લાગતો હતો.

‘મયૂર, જલદી કરને!’ કારણ વિના તેણે દીકરા પર ચીડ ઠાલવી. નાસ્તા-પાણીનાં પાર્સલ દીધા પછી ટ્રૉલીમાં મૂકેલો કોથળો ઊંચકતાં હાથ ધ્રૂજ્યો, ‘બૂતની જેમ જોયા શું કરે છે, હાથ લગાવ...’ વળી દીકરાને ઠપકારતાં બિચારો મદદે તો આવ્યો, પણ ચાર ડગલાં ચાલીને ટ્રેનના ફુટબોર્ડ સુધી પહોંચતાંમાં ધનરાજ હાંફી ગયો, કપાળેથી પસીનો દડદડવા લાગ્યો. આંખે અંધારાં આવતાં હોય એમ કોથળા પરની પકડ ઢીલી થઈ, છૂટી ને અણધાર્યું સઘળું વજન મયૂર પર આવતાં બિચારો બાજી જાળવી લે એ પહેલાં કોથળો પ્લૅટફૉર્મ અને ટ્રેનની વચ્ચેના ખાંચામાં સરકી ગયો.

હાય રામ. ફાટી આંખે અનહોનીને તાકતા ધનરાજની છાતીમાં પીડા ઊપડી. આ શું થઈ ગયું! પેલો આદમી તો દસ લાખ દઈને છૂટી ગયો, પણ આમાંથી લાશ નીકળી તો હું તો...

એ જ વખતે શાહબાઝે એકાદ ડાયલૉગ ફટકારતાં ભીડ તેને વધાવવા બેકાબૂ બની, અફરાતફરી મચી એના ધક્કાએ છાતી પર હાથ દાબતો ધનરાજ બેસી પડ્યો...

‘સા..હે...બ...’ મયૂરે અરેનને પકડ્યો, ‘મારા પપ્પાને અટૅક આવ્યો લાગે છે સાહેબ, જુઓ તે...’ બેઉ દોડ્યા. અરેને વૉકીટૉકી પર આદેશ આપ્યો, ઈટ્સ ઇમર્જન્સી. કૉલ ઍમ્બ્યુલન્સ.’...

... તાનિયા ઘા કરવા જ જાય છે કે ધડામના ધડાકાએ સોંપો સર્જી‍ દીધો. તાનિયાના હાથમાંથી ઈંડું વચકી પડ્યું...

...‘ખબ૨દાર!’ ઍરગનથી ફાયરિંગ કરનાર અરેન હતો, ‘અહીં એક માણસને હાર્ટ-અટૅક આવ્યો છે, રેલવે-હૉસ્પિટલની ઍમ્બ્યુલન્સ પાર્કિંગમાં આવી પહોંચી છે, સ્ટ્રેચરને અહીં સુધી આવવાનો રસ્તો કરો... મિસ્ટર ખાન, યુ પ્લીઝ ગો ઇનસાઇડ..’

કહેવું પડે, સિનેસ્ટારની શેહશરમ રાખ્યા વિના જાંબાઝ ઇન્સ્પેક્ટરે કેવું સંભળાવી દીધું! એક ધડાકામાં જનતાની સાન પણ ઠેકાણે આવી હોય એમ સ્ટ્રેચરવાળા માટે રસ્તો કરી આપ્યો. પણ ખાન અંદર જાય એ પહેલાં...

દાંત ભીંસીને તાનિયાએ ઈંડું ફેંક્યું ને...

ખચાક. ખાનના કપાળે જઈને ફૂટ્યું.

વૉટ ધ હેલ. મુખ્તાર આમતેમ ફાંફાં મારે છે ત્યાં બીજું ઈંડું તેના માથે ફૂટ્યું. ટોળામાં હસાહસ થઈ રહી, એમ થોડાઘણા ઉશ્કેરાયા : કોણે અમારા સ્ટારનું આવું અપમાન કર્યું?

દંગલ જામે એ પહેલાં અરેને બીજું ફાયરિંગ કર્યું : કોઈ તોફાન નહીં, અધરવાઇઝ નાછૂટકે અમારે બળજબરી કરવી પડશે...

અપમાનથી કાળઝાળ થયેલો ખાન ડબ્બામાં ઘૂસી ગયો હતો. એ સાથે ગાડી પણ ઊપડી એટલે મામલો બિચકતાં રહી ગયો!

€ € €

આઇ મેડ ઇટ!

વેર વાળ્યાના કેફમાં તાનિયા રાતભર ઊંઘી નહોતી, સવારે સ્ટોરરૂમનું બારણું ખૂલે કે સરકી જવાનું હતું...

તાનિયાની ધારણા પ્રમાણે સવારે બહારથી તાળું ખોલીને કોઈએ સ્ટોરરૂમ ખોલ્યો ખરો... પણ એ વ્યક્તિ બીજું કોઈ નહીં, અરેન હતો!

કાતરિયામાં એક છોકરીને જોવાની ધારણા અરેને નહોતી રાખી, ‘તમે! જે ખાન છોકરીઓનો હાર્ટ-થ્રોબ ગણાય છે એના પર તેં ઈંડું ફેંક્યું?’

‘જી અરેન,’ તાનિયા સ્વસ્થ હતી, ‘એના આરોપસર મારી ધરપકડ કરવા આવ્યા હો તો હું તૈયાર છું.’

અરેન તેને તાકી રહ્યો.

€ € €

‘એ એક રાતમાં કેટલું બધું બની ગયું...’

ત્રણ મહિના પછી, વિશ્વામિત્રીના કાંઠે અરેન તાનિયાને કહી રહ્યો છે, ‘સૌથી અચરજરૂપ છે તારું મારા જીવનમાં આવવું.’

‘અને તમારું મારા.’ તાનિયા મલકી, પિયુના ખભે માથું ટેકવ્યું.

એ રાત્રે ધનરાજને અટૅક આવ્યો, તેને સ્ટ્રેચર પર રવાના કરતી વેળા પણ અરેનના ધ્યાનમાં હતું કે ખાન પર ફેંકાયેલા ઈંડાનો ઘા ક્યાંથી થયો હોઈ શકે... પણ સ્ટોરરૂમ બહારથી બંધ હતો એટલે અંદર જે કોઈ હોય, છટકી શકવાનું નહોતું. પોતે ત્યાં જ જાત, પણ ભીડ વિખરાઈ પછી એકાદનું ધ્યાન ગયું : સાહેબ, ટ્રૅક પર કોથળો પડ્યો છે.

એમાંથી નીકળી લાશ. નગ્ન લાશનો ચહેરો જલાવી દેવાયેલો. ઓળખની કોઈ નિશાની નહીં. સવાલ એ છે કે પૅન્ટ્રી કારના સામાન જોડે ધનરાજ જ આ કોથળો મુકાવતો હતો?

અરેન તરત હૉસ્પિટલ દોડ્યો. ધનરાજ જોકે બચ્યો નહીં ને અહીં જ ઊતરી ગયેલા તેના દીકરાને એટલી ખબર હતી કે બાપાએ કોથળાને સગેવગે કરવાના દસ લાખ લીધેલા, પણ કઈ પાર્ટી પાસેથી એ તો બાપા જ જાણે...

ખેર, ગુનામાં સાથ દેવા બદલ મયૂરની ધરપકડ કરીને પોતે સ્ટોરમાં આવ્યો તો તાનિયાનો મેળાપ થયો...

તેના ઈંડા-હુમલા પાછળનું કારણ જાણીને જોકે પોતે કોઈ પણ ઍક્શન લેવાનું ટાળ્યું, બલ્કે ખાન જેવાને સબક આપવા બદલ બિરદાવી હતી. એમાં જ દોસ્તીની ધરી રચાઈ.

બીજે દહાડે મીડિયામાં વડોદરાની ઘટના છવાયેલી રહી. એક શખ્સનું મોત, સુપરસ્ટાર પર ઈંડાંનો વરસાદ, ટ્રેક પર મળેલી લાશ ને પોલીસ હજી અંધારામાં!

‘કોથળામાં મળેલી લાશ’ બાબત સાંભળીને તાનિયા સીધી અરેન પાસે પહોંચી હતી. ધનરાજ અને દાઢીવાળા શખ્સનો પોતે જોયેલો મેળાપ કહી સંભળાવ્યો, ‘એ દાઢીવાળામાં કશુંક યુનિક હતું અરેન, ડોન્ટ નો વૉટ...’

પછી તો આ નિમિત્તે પણ મળતાં રહ્યાં. તપાસમાં તો નવું કંઈ ન નીકળ્યું, પણ બે જુવાન હૈયાં પ્રણયના એકરારે પહોંચી ચૂક્યાં. બધું જાણીને બેઉના ઘરના સૌ રાજીના રેડ.

તાનિયાએ તો ખાનને પત્ર પણ લખ્યો. ચેમ્બુરમાં પોતાની સાથે ઘટેલી ઘટના ઢાંકીને તેણે ઉમેર્યું હતું : તમને ઈંડું મારી મેં મારા એ અપમાનનો બદલો લીધો છે, તમારા એ બૉડીગાર્ડને પણ કહી દેજો કે હિસાબ ચૂકતે.

(વડોદરાથી પોસ્ટ થયેલા લેટરમાં મોકલનારનું નામ-ઠામ નહોતાં પછી ખાનથી થઈ પણ શું શકે! પોલીસ તો ઑલરેડી નાદારી જાહેર કરી ચૂકેલી, અધધધ ગણાય એવી ભીડમાંથી કોણે અટકચાળું કર્યું કેમ ખબર પડે? એમાં આ પત્ર ખાનને પડ્યા પર પાટુ જેવો વસમો લાગ્યો, પણ શું થાય? કાગળ ફાડીને ફગાવ્યો. બળતા જીવને પંપાળ્યો : હશે. મારે તો ફિલ્મ હિટ ગઈ એટલે બસ. ખરેખર તો ઈંડાપ્રકરણને કારણે વધુ પબ્લિસિટી મળી એટલે મારે તો તને થૅન્ક્સ કહેવાના હોય અજાણી છોકરી!)

મિયાં પડે પણ તંગડી ઊંચીની કહેવત સાચી ઠેરવતો ખાન નવા પ્રોજેક્ટમાં વ્યસ્ત થઈને વીત્યું વિસારી ચૂક્યો છે, પણ અહીં પેલા દાઢીવાળાનો પત્તો મળતો નથી...

‘છોડ એ બોઝલ વાતો. આજે તને એક કૉન્સર્ટમાં લઈ જાઉં. લતાજીનાં ડ્યુએટ્સની કોન્સર્ટ છે.’

અરેને ધરેલું બ્રોશ૨ તાનિયા નિહાળી રહી. આખરી ધડાકો આ કૉન્સર્ટમાં થવાનો હતો એની ત્યારે ક્યાં ખબર હતી?

€ € €

‘વેલકમ ટુ અવર શો...’

શનિની રાત્રે પાલિકાનું ઑડિટોરિયમ લગભગ ફુલ હતું. સવાબે કલાકની નૉનસ્ટૉપ ચાલનારી કૉન્સર્ટમાં જૂનાં ગીતોના ચાહકોને જલસો થઈ જવાનો હતો.

‘હી ઇઝ આકાર શાહ.’ આગલી હરોળમાં ગોઠવાયેલા અરેને તાનિયાને ઍન્કર બાબત જાણ કરી, ‘શહેરનો જાણીતો સિંગર-કમ-ઑર્ગેનાઇઝર છે. પાછલાં ત્રણેક વરસથી શોઝ પર્ફોર્મ કરે છે. શહેરમાં તેના ઘણા ચાહકો છે. બાપદાદાનો પૈસો પુષ્કળ છે એટલે બહાર કશે શો કરવા જતો નથી.’

દેખાવમાં પૂર્ણ પુરુષત્વની પ્રતિકૃતિ જેવો કામણગારો આકાર એટલો જ ચાર્મિંગ છે. તેને સ્ટેજ પર જોતાં જ ફીલ-ગુડની ફીલિંગ આવે અને અવાજ...

અવાજ! તાનિયા ચમકી. આંખો બંધ કરીને એકકાન થઈ. આકાર શબ્દો બોલતો ગયો એમ તેની ભીતર સળવળાટ સર્જા‍તો ગયો. છેલ્લે-છેલ્લે અરેનનો હાથ દબાવી બેઠી, ‘આઇ ગૉટ હિમ અરેન, ઇટ્સ હી.’

હેં

‘મેં કહ્યુંને દાઢીવાળામાં કશુંક યુનિક હતું... એ તેનો અવાજ! આટલો સુરીલો, ધીરગંભીર... હી ઇઝ ધ વન’ તાનિયાને દ્વિધા નહોતી.

કૉન્સર્ટ પૂરી થઈ ત્યાં સુધીમાં અરેને આગળની મૂવ વિચારી લીધી.

€ € €

ફીલિંગ હૅપી.

ઑડિયન્સમાં બેઠેલી ઝરણા અજંપામુક્ત છે. ‘પતિ અમદાવાદથી ગાયબ’ થયા પછી પ્રથમ વાર પોતે સોશ્યલ થઈ છે. ધીરે-ધીરે આમ જ આકુને મળતા જઈને રિલેશન જમાવવાની છે... કલાશ્રીના પ્રોગ્રામમાં આવી જ એક કૉન્સર્ટ દરમ્યાન અવનીશે આકુનો પરિચય કરાવેલો ને હું તેને જોતાંવેંત પ્રેમમાં ખાબકી હતી... સુરીલો જુવાન એટલો જ પૌરુષસભર પણ નીકળ્યો. તેને પણ મારો નેડો લાગ્યો જેમાં છેવટે અવનીશે જીવ ગુમાવવો પડ્યો.

બટ નો રિગ્રેટ્્સ. બેશક, ધનરાજ અણધાર્યા અટૅકમાં ઊકલી ગયો એમાં પાર્સલ વડોદરામાં જ ઝડપાયું, પણ એનો રેલો અમારા સુધી પહોંચ્યો નથી. પહોંચે પણ કેમ? આકુની ગણતરી સાચી હતી. સાત તારીખે જે માણસ જીવિત હોવાનો પુરાવો હોય તેને છઠ્ઠીની રાત્રે મળેલી લાશ સાથે કોઈ કનેક્ટ કરે પણ શું કામ?

આટલા વખતમાં કંઈ થયું નહીં અને હવે થશે પણ નહીં... હવે તો બસ, હું ને મારો આકુ..!

- આજ ખુમારમાં કૉન્સર્ટ પછી, શ્રોતાગણ-સાજિંદા વિખરાયા બાદ નક્કી થયા મુજબ આકુને મળવા તે ગ્રીનરૂમ તરફ ગઈ કે...

‘યુ આર કૉટ મિસ્ટર આકાર. ધનરાજ સાથે તમારી વાતચીતનો અમારી પાસે ચશ્મદીદ ગવાહ છે. અફકોર્સ, તમે ત્યારે દાઢીમાં હતા; પણ તમારો અવાજ... ગાયક માટે ખરી ઓળખ તેનો અવાજ હોય છે, એ છુપાવવાની તમે કાળજી રાખી હોત તો કદાચ...’

શો પછી બધાના નીકળ્યા બાદ પોતે ઝરણાની રાહ જોતો હતો ત્યાં અરેન-તાનિયાની જોડી આવી ચડી. પોતાની ઓળખ ઇન્સ્પેક્ટર તરીકે આપી અરેને મને ચોંકાવ્યો, એમાં હવે આ ધડાકો. જાતને સ્વસ્થ કરીને આકાર કહેવા જાય છે કે લતાજીની કૉપી કરનારા સેંકડો છે, એમ ધૅટ દાઢીવાળાએ મારા અવાજની કૉપી કરી હોય એવું ન બને? પણ તેના શબ્દો ફૂટે એ પહેલાં...

‘નહીં...’ પ્રિય પુરુષને ઘેરાયેલો જોઈને ઝરણા ચીખી ઊઠી, ‘આકુ નિર્દો‍ષ છે સાહેબ, ખૂની હું છું...’

ખલાસ! ક્રાઇમ નેવર પેઝ એ આનું નામ!

€ € €

ઉપસંહાર : ગુનેગારોને ઘટતી સજા થઈ. અવનીશ મર્ડરકેસ વડોદરામાં ખૂબ ગવાયો. આજે તો જોકે ઉપરાઉપરી ત્રણ ફ્લૉપ્સ આપ્યા પછી ખાનનાં વળતાં પાણી છે. તેની ટ્રેનયાત્રા એગ-અટૅકને કારણે મેમરેબલ રહી છે માત્ર. હા, એ યાત્રા ફળી હોય તો અરેન-તાનિયાને. ડૉક્ટર થયેલી તાનિયા ઇન્સ્પેક્ટરને પરણી છે ને તેમનો સંસાર સદા મઘમઘતો રહેવાનો એટલું વિશેષ.

(સમાપ્ત)

Add comment


Security code
Refresh

Joomla SEF URLs by Artio